Wöi ma za Mathematik nuu Rechnen gsagt haout
In altn Böichern ka ma lesn
wöis fröja in da Schöll is gwesn
va da Volks-Schöll is die Red"
am Dorf gabs ja wos anners net
Vöja Klassn in oin Zimma
vorstelln kannst da des heit nimma
Vom Stiftland dream stammt die Gschicht
die aafgschriem is in dem Gedicht
Da Lehra woa da alte Kraus
der bildete die Kinna aus
in allen Fächern - und aa Sport
hört'n Generationen aaf saa Wort
und des schaa seit gout 30 Jaoua
kaam zan glaam, doch des is waoua
Da Kraus des woa a gouta Maa
der koina Flöing wos aatou kaa
A Lehra, wöi sies seltn gibt
drum woar a aa sua aaich beliebt
An aram Freida im Aprül
bassiert, wos gwiß ka Lehra wüll:
Da Schulrat kummt mit seinm Chauffeur
da Kraus murmelt: So ein Malheur!
Waal am Stundnplan „Rechnen" stähit
und er gern wos anners häit
Des is niat grod saa Lieblingsfach
er schaffis halt sua mit Ach und Krach
Dann sagt a leichte Aafgam aa
dass wirkli a nix schief göi kaa
Wöi naou vabei die Rechenstunde
daou macht da Schulrat seine Runde
und schaut si alle Hefta aa
naou schidlt a sein Kuapf der Maa
und nachat platz nan fast der Krogn:
„Mei liwa Kraus, i mou schaa sogn
Sua wos ho i schaa lang niat gsäh
daou schauns amal aaf die Hefta her
50 Prozent liegn ganz danem
Wos sogns? Wöi kanns denn sua wos gem"
Da Kraus der kratzt sich hinterm Aoua
und fehrt si mit da Hend durch d Haoua
Naou schmeißt a sich vull in die Brust
und sagt zan Schulrat siegbewußt:
„Herr Schulrat - des kann unmegli saa
ich hoff, des leichtet ihnen aa
daou deischns ihnen ganz bestimmt
waal in der Klass blaouß 40 Kinna sind!"
Horst Königsberger
Germering
Ortsverein Waldershof e.V. im Fichtelgebirgsverein e.V.