von Stephan Schremmer

S‘ wird wieder Summa

Neile ho i mer denkt,

mousst ner mal wieder in die Boodhuarsn einesteign,

s‘ wird ja bald wieder Summa und boon wüllst ja a göih.

Passt hout’s ja no, aber als i vorm Spöigl stöih –

oh mei, wos für a Wampm!

Also Bauchmuskln aspanna und d’Luft ahaltn – göiht niat,

weil: Wos für Bauchmuskln und – da wir i ja glei blau um die Goschn.

Wos daue öitzert blouß?

Vielleicht, wenn i mi im Schwimmbad hileg,

vielleicht fallt er am End niat sour aaf, mei Bauch.

Aber des is a nix, denn lieg i am Bauch,

nachert dout mir mei Kreiz wäh und lieg i am Rückn,

nachert sia i ja niat döi schöina Moidla in ihre Bikinis.

Also nix is.

Ho i mei Wei gfrougt, wos i öitzert blouß dou soll,

hout’s niat gsagt, i soll onehma, da wa des Problem glei aas der Wölt!

I also nei in die Drogerie und ho mir a Diätpulver kafft,

und am Hoimweg glei no fünf Kastn Wasser gholt und lous is ganga,

des Onehma.

Naja, zwöi Dooch ho i’s ja gschafft, des greisliche Pulver zu schluckn

und des Pfeiferlwasser zu saffn,

aber dann hout der Dameradl an Zoigl gschenkt, d’Nachbarn ham grillt,

d’Böiergärtn ham aafgmacht und die Festla san aganga.

Scheiss aaf’s Schwimmbad,

schöine Moidla gitt’s sour a zum schaua.

Und mei Boodhuarsn kaa azöing wer moch!